महाविद्यालयात रंगरंगोटी करत असताना चार कर्मचाऱ्यांना शॉक लागल्याने या दुर्घटनेत चार कर्मचाऱ्यांचा जागीच दुर्देवी मृत्यू झाला आहे. भाजपचे नेते आणि माजी राज्यमंत्री आमदार प्रवीण पोटे यांच्या अभियांत्रिकी महाविद्यालयात आज ही दुर्देवी घटना घडली आहे. या घटनेमुळे परिसरात एकच खळबळ उडाली आहे.
अमरावतीत प्रवीण पोटे यांचे पीआर पोटे इंजिनिअरिंग महाविद्यालयाच्या मुख्य गेटची रंगरंगोटी सुरू होती. या गेटजवळून हायपॉवरची विद्युत तारा गेलेल्या आहेत. हे कर्मचारी शिडीवर चढून रंगरंगोटी करत असताना शिडीला विद्यूत तारेचा स्पर्श झाला. त्यामुळे त्यांना भयंकर शॉक लागला. त्यामुळे हे चारही कर्मचारी शिडीला चिकटले. त्यानंतर जोराचा झटका बसल्याने हे चारही कर्मचारी खाली कोसळले. सूत्रांनी दिलेल्या माहितीनुसार यातील तिघांचा जागीच मृत्यू झाला आहे. तर एकाचा रुग्णालयात मृत्यू झाला आहे. त्यामुळे या परिसरात एकच खळबळ उडाली आहे.
रंगरंगोटीला महाविद्यालयातील शिपाई
या दुर्घटनेत अक्षय सावरकर (वय 26), प्रशांत शेलोरकर (वय 31), संजय दंडनाईक (वय 45) आणि गोकुळ वाघ (वय 29) असे चारही कर्मचाऱ्यांचा मृत्यू झाला आहे. ते चौघेही याच कॉलेजमध्ये शिपाई पदावर कार्यरत होते. कॉलेज प्रशासनाने बाहेरुन मजूर न बोलावता थेट कॉलेजमधील कर्मचारीच कॉलेजच्या गेटच्या रंगरोटीसाठी लावल्याने आश्चर्य व्यक्त केले जात आहे.
या घटनेची माहिती मिळताच पोलिसांनी घटनास्थळी धाव घेतली आहे. चारही मृतदेह पोलिसांनी ताब्यात घेतले असून शवविच्छेदनासाठी मृतदेह रुग्णालयात पाठवण्यात येत असल्याची माहिती सूत्रांनी दिली आहे. या प्रकरणी हलगर्जीपणा करणाऱ्यावर गुन्हे दाखल करण्याची मागणी करण्यात येत आहे.
