राज्य वस्त्रोद्योग आयुक्त शीतल तेली-उगले यांच्या हस्ते झाले होते उदघाटन, हातमाग संस्थांद्वारे ग्राहकांना 20% सवलत
https://youtu.be/k14wp_agbYA
नागपूर ब्युरो : महाराष्ट्र राज्य हातमाग महामंडळ लि., नागपूर यांनी उत्पादित केलेल्या उच्च दर्जाच्या उत्पादनांचे विशेष प्रदर्शन व विक्री दक्षिण मध्य सांस्कृतिक केंद्र, 56/1, टेम्पल रोड, सिविल लाइन्स, नागपूर येथे आयोजित करण्यात आली आहे. बुधवारला प्रदर्शनाचे शेवटचे दिवस असल्याने जास्तीत जास्त संख्येने पोहचुन याचा लाभ घेण्याचे आवाहन आयोजकांनी केले आहे.
या प्रदर्शनाचे उद्घाटन मागील 20 ऑक्टोबर ला राज्य वस्त्रोद्योग आयुक्त आणि महाराष्ट्र राज्य हातमाग महामंडळ लि. नागपूरच्या व्यवस्थापकीय संचालिका शीतल तेली-उगले यांच्या हस्ते करण्यात आले. यावेळी दक्षिण मध्य विभागीय सांस्कृतिक केंद्र नागपूरचे संचालक डॉ.दीपक खिरवडकर यांची प्रमुख उपस्थिती होती. या प्रदर्शनाला नागरिकांचा उत्स्फूर्त प्रतिसाद मिळत आहे.
हातमागावर बनवलेले विविध प्रकारचे कपडे या प्रदर्शनात उपलब्ध आहेत. यामध्ये सिल्क, टसर करवती साड्या, पैठणी साड्या (GI प्रमाणित), सिल्क टसर ड्रेस मटेरियल, लेडीज-जेंट्स आणि लहान मुलांचे कपडे, बांबू केळी मिश्रित कापड आणि साड्या, कॉटन साड्या, स्कार्फ, स्टोल्स, दुपट्टे, टाय, दैनंदिन वापरातील चादरी, टॉवेल. बेडशीट, रग्ज इत्यादिंचा यात समावेश आहे.
नागपूरकरांनी या प्रदर्शनाचा लाभ घ्यावा, असे आवाहन वस्त्रोद्योग आयुक्त व महा हातमागाच्या व्यवस्थापकीय संचालक शीतल तेली-उगले यांनी केले आहे. हातमागावर तयार होणारी उत्पादने ही कारागिरांची मेहनत आणि कारागीर यांचा अनोखा मेळ असल्याचे ते म्हणाले. याचा सन्मान करून नागपुरात आयोजित केलेले प्रदर्शन यशस्वी करण्यासाठी नागरिकांनी येथे आवर्जून भेट द्यावी, असे आवाहन त्यांनी केले आहे.
या प्रदर्शनातील विक्रीमुळे विणकरांच्या रोजगारात वाढ होण्यास मदत होणार असून, शहरातील रहिवाशांना परवडणाऱ्या दरात दर्जेदार हातमाग कापड उपलब्ध होणार असल्याचे त्यांनी सांगितले. 20 ऑक्टोबरपासून सुरू झालेले हे प्रदर्शन 2 नोव्हेंबरपर्यंत खुले राहणार आहे. प्रदर्शनात दररोज सकाळी 11 ते रात्री 8 या वेळेत नागरिकांना भेट देता येतील.
अस्सल सिल्क व कॉटन साड्या व घरगुती वापरासाठी लागणारे चादरी, टॉवेल, नॅपकिन आणि सिल्क व कॉटन कापड खरेदीसाठी ग्राहकांचा उत्तम प्रतिसाद मिळत आहे. हातमागावर काम करणाऱ्या कुशल विणकर कारागिरांना नियमित रोजगार उपलब्ध होण्याच्या उद्देशाने हे प्रदर्शन आयोजित करण्यात आले आहे. नागपूरकरांनी एकदा या प्रदर्शनाला अवश्य भेट द्यावी आणि अस्सल हात मागाचे कापड खरेदी करावे असे आव्हान आयोजकांकडून करण्यात आले आहे.
